«Դուք սահմանափակում եք քաղաքացիների տեղաշարժը». Վալերի Օսիպյանը զգուշացրեց Նիկոլ Փաշինյանին
«Դուք սահմանափակում եք քաղաքացիների տեղաշարժը»,- Նոր Նորքի 6-րդ զանգվածում Նիկոլ Փաշինյանին ասաց Երևանի փոխոստիկանապետ Վալերի Օսիպյանը։
«Մենք քաղաքացիներից բազմաթիվ բողոքներ են ստանում, որ ոմանք ուշանում են հիվանդանոցից, Իսակովի պողոտան 2 անգամ փակել եք՝ օդանավակայանից են ուշացել ոմանք, ուշացել են տարբեր հանդիպումներից։ Առհասարակ, սահմանափակվել են նրանց սահմանադրական իրավունքները»,- ասաց Օսիպյանը։
Նիկոլ Փաշինյանն էլ նշեց, որ չսահմանափակեն իրենց իրավունքը և ճանապարհ տան։ Ոստիկանությունը թույլ չտվեց քայլել փողոցներով։ Վալերի Օսիպյանն ասաց, թե երեկվա երթերի ժամանակ ցուցարարները վիրավորել են ոստիկաններին. «Պարոն Փաշինյան, դուք կազմակերպիչն եք»։
Փաշինյանը, սակայն, կոչ արեց բոլորին հավաքվել 6-րդ Մասիվում։ Օսիպյանն էլ ասաց, որ որպես կազմակերպիչ ստիպված է լինելու հեռացնել Փաշինյանին։
Վերջինս մեջ բերեց «Հավաքների ազատության մասին» օրենքը, նշելով, թե կարող են իրականացնել մինչև 100 հոգանոց երթեր։ Իսկ Օսիպյանն ասաց, որ իրենք միշտ 100-ից ավելի են լինում երթերի ժամանակ։
«Պարոն Փաշինյան, աստեղ չկա ինքնաբուխի կամ շտապ հանրահավաքի բան»,-ասաց Օսիպյանը։
Նիկոլ Փաշինյանը նկատեց. «Գիշերը անհայտ անձինք հարձակվել և ջարդել են մեր շարժման մասնակիցների մեքենաներ, ոստիկանությունը որևէ միջոց չի ձեռնարկել, և սա բողոքի երթ է՝ այդ գործողությունների նկատմամբ, սա բողոքի երթ է ոստիկանության կողմից մեր կողմնակիցներին ապօրինի բերման ենթարկելու կապակցությամբ, սա բողոքի երթ է՝ մեր կողմնակիցներիր նկատմամբ տեղի ունեցած հարձակումների կապակցությամբ»։
Օսիպյանը նախազգուշացրեց՝ դադարեցնել երթը։
