Գվարդիոլան պատրաստ է ստորագրել նոր պայմանագիր, բայց նախ ուզում է տիտղոս նվաճել
Ինչպես հաղորդում է Daily Mail-ը, «Մանչեսթեր Սիթիի» գլխավոր մարզիչ Պեպ Գվարդիոլան պատրաստ է ստորագրել նոր երկարաժամկետ պայմանագիր անգլիական ակումբի հետ, բայց միայն այն բանից հետո, երբ «քաղաքայինների» հետ կնվաճի առաջին տիտղոսը:
Ըստ աղբյուրի տվյալների՝ «Բարսելոնայի» նախկին մարզիչն արդեն պայմանավորվել է նոր համաձայնագրի պայմանների վերաբերյալ, ըստ որի՝ նրա աշխատավարձը կկազմի տարեկան 20 մլն ֆունտ:
Գվարդիոլայի ներկայիս պայմանագիրը լրանում է հաջորդ մրցաշրջանի վերջում, իսկ նորը նախատեսված կլինի մինչև 2021թ. ամառ: Սակայն, նախքան նոր պայմանագրի մասին պաշտոնապես հայտարարելը, Գվարդիոլան ուզում է նվաճել իր առաջին տիտղոսն ակումբում:
Հիշեցնենք, որ այսօր «Մանչեսթեր Սիթին» կխաղա «Արսենալի» հետ Անգլիական լիգայի գավաթի եզրափակչում:
Պատրաստեց Անի Գաբուզյանը
