«Կիևին ցուցաբերվող ռազմական օգնությունը չի սահմանափակվի Javelin համալիրներով». Վոլքեր
ԱՄՆ-ի Պետդեպարտամենտի Ուկրաինայի հարցերով հատուկ ներկայացուցիչ Կուրտ Վոլքերը հայտարարել է, որ Կիեւին ցուցաբերվող ռազմական օգնությունը չի սահմանափակվի Javelin հակատանկային հրթիռային համալիրների (ՀՏՀՀ) մատակարարմամբ:
Այդ մասին նա հայտնել է հրապարակված հարցազրույցում, որը նա «Եվրոպական ճշմարտություն» հրատարակությանը տվել է Մյունխենի անվտանգության խորհրդաժողովի ժամանակ: «Javelin համալիրները կլինեն օգնության մի մասը, բայց խոսքը շատ ավելիի մասին է: Խոսքն ավելի ընդգրկուն օգնության մասին է»,-ասել է Վոլքերը:
Ընդ որում՝ նա ընդգծել է, որ ԱՄՆ-ի նպատակը «ուկրաինական բանակի սպառազինության մեջ տեղ գտած բացերը լրացնելն է՝ մեծացնելով իրենց տարածքը պաշտպանելու Ուկրաինայի զինված ուժերի կարողությունը»: Վոլքերը ճշտել է, որ սպառազինության մի մասը Կիեւը կստանա անվճար, «բայց միեւնույն ժամանակ Ուկրաինան իրավունք է ստանում գնել այն սպառազինությունը, որի կարիքն ինքն ունի», հաղորդել է ՏԱՍՍ-ը:
