«Բազել»-«Մանչեսթեր Սիթի». Կլինի՞ սենսացիա

Անկասկած, այս խաղի ֆավորիտը մանչեսթերյան ակումբն է, բայց մեկ այլ մանչեսթերյան ակումբ արդեն իսկ պարտվել է «Սանկտ-Յոկաբ Պարկ» մարզադաշտում: Կկարողանա՞ «Բազելը» ևս մեկ սենսացիայի հեղինակ դառնալ:

 «Բազել»

Սովորական չէ շվեյցարական ակումբին տեսնել Շվեյցարիայի առաջնության ոչ առաջին հորիզոնականներում, սակայն այս մրցաշրջանը նրանք այնքան էլ լավ չմեկնարկեցին: «Բազելի»՝ 9-րդ անընդմեջ չեմպիոնությունը հարցականի տակ է:

Չեմպիոնների լիգայում շվեյցարացիները մի խմբում էին  «Մանչեսթեր Յունայթեդի» ԲԿՄԱ-ի և  «Բենֆիկայի հետ»: Ակումբը կարողացավ հաղթել 4 խաղում, այդ թվում՝ անգլիացիների հետ տնային խաղում: Առհասարակ, «Բազելը» տնային խաղերում շատ լավ արդյունքներ ունի. Չեմպիոնների լիգայի տնային խաղերում բաց է թողել 2 գնդակ, երկուսն էլ՝ ԲԿՄԱ-ից:

Մեկնարկային կազմի հետ շվեյցարական ակումբը լուրջ խնդիրներ չունի: Կազմում չեն միայն պահեստային դարպասապահ Սինիորին և կիսապաշտպան Լուկա Ջուֆին:

«Մանչեսթեր Սիթի»

Խմբային փուլում մանչեսթերցիներն ակնհայտ ֆավորիտ էին: Գվարդիոլայի սաները վստահորեն պահեցին ֆավորիտի կոչումը՝ հաղթելով մեկնարկային 5 խաղերն ընդհանուր 13:3 հաշվով:

Անգլիայի առաջնությունում մանչեսթերցիների գործերը շատ լավ են: Չեմպիոնությունը շատ հավանական է, քանի որ մոտակա մրցակցից քաղաքայիններն առաջ են 16 միավորով:

Փլեյ-օֆֆի առաջին խաղում դժվար թե խաղան Դելֆը, Մենդին և Սանեն, հարցականի տակ է Դավիթ Սիլվայի մասնակցությունը:

Վիճակագրություն և անձնական հանդիպումներ

• «Մանչեսթեր Սիթին» հաղթել է վերջին արտագնա 17 խաղերից 13-ում
• 6 խաղ անընդմեջ անգլիացիները գոլ են խփում առաջին խաղակեսում
• Չեմպիոնների լիգայի արտագնա խաղերում  «Սիթին» խփել է առնվազն 3 գոլ

Կանխատեսում

Ոչ ոք չի երաշխավորում, որ քաղաքայիները հեշտությամբ կհաղթեն, սակայն  «Բազելն» անգամ սեփական դաշտում դժվար թե կարողնանա դիմակայել Գվարդիոլայի թիմին:

Մանչեսթերյան ակումբը շատ է գոլ խփում, բայց պետք է հաշի առնել նաև այն, որ վերջին շրջանում շատ է գոլ բաց թողնում: Այնպես որ, կարելի է սպասել գոլառատ հանդիպման:

Հիշեցնենք, որ խաղը տեղի կունենա այսօր՝ Երևանի ժամանակով 23:45-ին:

Սիրարփի Աղաբաբյան