«Հայաստանը կամուրջ է, ոչ թե բաժանարար գիծ». Աշոտյանը՝ «Ֆրիդրիխ Էբերտ»-ի պաշտոնյային
ՀՀ ԱԺ արտաքին հարաբերությունների մշտական հանձնաժողովի նախագահ Արմեն Աշոտյանը փետրվարի 8-ին հանդիպել է «Ֆրիդրիխ Էբերտ» հիմնադրամի Հարավային Կովկասի տարածաշրջանային գրասենյակի տնօրեն Ֆելիքս Հեթի հետ:
Հանդիպմանը ներկա է եղել նաեւ «Ֆրիդրիխ Էբերտ» հիմնադրամի Եվրոպայում խաղաղության եւ համագործակցության գրասենյակի գիտաշխատող Ալեքսանդրա Վասիլեւան:
Ողջունելով հյուրին ՀՀ Ազգային ժողովում՝ Արմեն Աշոտյանը նշել է, որ հանձնաժողովը բարձր է գնահատում հիմնադրամի հետ ձեւավորված գործընկերային հարաբերությունները:
Կողմերն անդրադարձել են ՀՀ-ԵՄ հարաբերություններին, վերջերս ստորագրված Համապարփակ եւ ընդլայնված գործընկերության համաձայնագրին՝ կարեւորելով դրա ոչ միայն քաղաքական, այլեւ տնտեսական համագործակցությանը նպաստող դերը:
Արմեն Աշոտյանը, անդրադառնալով Եվրոպական միության հետ Հայաստանի գործընկերային հարաբերությունների համապարփակ զարգացման հանձնառությանը, նշել է, որ լինելով Եվրասիական տնտեսական միության անդամ՝ Հայաստանը պատրաստ է դառնալ կամուրջ եւ ոչ թե բաժանարար գիծ գերտերությունների շահերի համադրման համար:
