«Ելք» դաշինքի երթն ավարտվեց. հաջորդ երթը կանցկացվի փետրվարի 5-ին
«Փետրվարի 5-ին իրականացնելու ենք մեր հաջորդ երթը, որն ունենալու է կոնկրետ նպատակ և պահանջ. Եթե մինչև այդ իշխանությունը, խորհրդարանական մեծամասնությունը չնախաձեռնեն հարկային օրենսդրության փոփոխություն, «Ելք» դաշինքը վերջնական տեսքի է բերում Հարկային օրենսգրքի փոփոխությունների իր տարբերակը, և մենք երթով կարձանագրենք մեր օրակարգի հաջորդ քայլը՝ կպահանջենք, որպեսզի ԱԺ պատգամավորների ¼-ը ստորագրի այդ օրակարգով արտահերթ նիստ անցկացնելու պահանջի տակ, որպեսզի այդ գները հետողորմյա արվեն»,- այսօր «Ելք» դաշինքի կազմակերպած երթի ավարտի ժամանակ այս մասին ասաց ԱԺ «Ելք» խմբակցության ղեկավար Նիկոլ Փաշինյանը։
Նա կոչ արեց փետրվարի 5-ին մասնակցել երթին։ Անդրադառնալով այն քննադատություններին, որ իրենք փոխանակ թանկացնողների դեմ պայքարեն՝ թանկացումների դեմ են պայքարում, Փաշինյանն ասաց, որ «Ելք» դաշինքը պայքարել և պայքարելու է թանկացնողների դեմ։
Երթը եզրափակվեց «Ո՛չ թանկացումներին», «Ո՛չ թալանին», «Իջեցում» վանկարկումներով։
