Հացադուլ հայտարարած ուսանողները հրաժարվում են բացել լսարանի դուռը, որպեսզի իրենց չհեռացնեն այնտեղից. «Ազատություն»

Դասադուլի 6-րդ օրը «Հանուն գիտության զարգացման» նախաձեռնության անդամներից հինգն այսօր Երևանի պետական համալսարանի սոցիոլոգիայի, ինֆորմատիկայի և կիրառական մաթեմատիկայի ֆակուլտետների մասնաշենքի լսարաններից մեկում անժամկետ հացադուլ են սկսել։

Հացադուլավորների շարքում է նաև նախաձեռնության համակարգողներից Դավիթ Պետրոսյանը։

«Նրանք սա արել են ուսանողական անտարբերությունն ու հանրային անտարբերությունը կոտրելու համար»,- ասել է համակարգող խմբի անդամներից Վահան Կոստանյանը։

«Ազատության»-ը հաջողվեց փակ դռան հետևից զրուցել հացադուլավորներից Դավիթ Պետրոսյանի հետ։ Վերջինս հայտարարեց՝ հացադուլը կդադարեցնեն, երբ խորհրդարանը կասեցնի «Զինվորական ծառայության և զինծառայողի կարգավիճակի մասին» օրենքի նախագիծը։