Սերժ Սարգսյանն ու Կարեն Կարապետյանը պայմանավորվե՞լ են. «ՀԺ»
Թե իշխանության կուլիսներում և թե մամուլում լուրեր են շրջանառվում, որ Սերժ Սարգսյանն ու Կարեն Կարապետյանը ի վերջո համաձայնության են եկել, թե ով է զբաղեցնելու ՀՀ վարչապետի պաշտոնը 2018 թվականից հետո:
«Հայկական Ժամանակ» թերթի տեղեկություններով՝ Սերժ Սարգսյանը Կարեն Կարապետյանին հայտնել է, որ ինքը մտադիր է 2018 թվականից հետո զբաղեցնել վարչապետի պաշտոնը եւ առաջարկել է, որ Կարեն Կարապետյանը այդ ժամանակ ստանձնի փոխվարչապետի պաշտոնը:
«Կարեն Կարապետյանն էլ, ըստ մեզ հասած լուրերի, փորձել է հակադարձել, թե իրեն խոստացել էին, որ 2018 թվականից հետո էլ է ինքը շարունակելու զբաղեցնել վարչապետի պաշտոնը, ինչին Սերժ Սարգսյանը հակադարձել է, թե Կարեն Կարապետյանն էլ խոստացել էր, որ ներդրումներ են լինելու…
Ըստ մեր աղբյուրների՝ Կարեն Կարապետյանը սկզբում համաձայն չի եղել Սերժ Սարգսյանի առաջարկին ու ասել է, թե հրաժարական կտա, ինչին ի պատասխան Սերժ Սարգսյանն առաջարկել է մի քանի օր էլ լավ մտածել իր առաջարկի վերաբերյալ ու նոր որոշում կայացնել՝ հասկացնելով, որ չի համոզի Կարեն Կարապետյանին՝ հետ կանգնել հրաժարականից:
Մի քանի օր անց արդեն Կարեն Կարապետյանը համաձայնել է Սերժ Սարգսյանի առաջարկին՝ նրա վարչապետությամբ զբաղեցնել փոխվարչապետի պաշտոնը:
Այս լուրերի կապակցությամբ մեկնաբանություն խնդրեցինք վարչապետի մամուլի խոսնակ Արամ Արարատյանից:
«Թույլ տվեք ինձ բամբասանքի մակարդակի լուրեր չմեկնաբանել: Այդ հարցին բազմիցս վարչապետն անդրադարձել է եւ իր մոտեցումը հայտնել է: Ես այստեղ ավելացնելու բան չունեմ»,- armtimes.com-ին ասաց Արամ Արարատյանը»:
Ամբողջությամբ կարող եք կարդալ «Հայկական Ժամանակ» թերթի այսօրվա համարում:
