«Բարսելոնա»-«Օլիմպիակոս». Ունե՞ն արդյոք շանսեր հույները
«Օլիմպիակոսը» դեռևս չի կարողանում միավորներ վաստակել Չեմպիոնների լիգայի D խմբում: Կլինի՞ արդյոք «Բարսելոնան» խմբի առաջին թիմը, որ միավորներ կզիջի հույներին:
«Բարսելոնա»
Չեմպիոնների լիգայում կատալոնացիների գործերն իդեալական են: 2 խաղ, 2 չոր հաղթանակ:
Ներքին առաջնությունում կատալոնացիների գործերը ևս լավ են՝ առաջին հորիզոնական և 4 միավորի տարբերություն՝ մոտակա մրցակցից:
«Բարսելոնան» ընդամենը 3 գնդակ է բաց թողել այս մրցաշրջանի 10 խաղերում: «Կամպ Նոու» մարզադաշտում կատալոնացիները հաղթել են բոլոր խաղերում՝ ընդհանուր 19:1 հաշվով: 19 գնդակից 12-ը կատալոնացիները խփել են երկրորդ խաղակեսում:
«Օլիմպիակոս»
Հունաստանի չեմպիոնները դեռևս չեն գրանցում լավ արդյունքներ: Եթե «Սպորտինգին» նրանք պարտվեցին բավականին արժանի՝ 2:3 հաշվով, ապա Թուրինում պարզապես տապալվեցին:
Անգամ կատալոնական ակումբին հաղթելու դեպքում հունական ակումբը հաջորդ փուլ դուրս գալու քիչ հնարավորություն ունի:
Ցավալի է, բայց շատ քիչ է հավանականությունը, որ հունական ակումբի ներկայացուցիչները մեկնել են Բարսելոնա պայքարելու համար: Որպես այս խոսքերի ապացույց՝ պարզապես պետք է դիտել նախորդ տուրում Թուրինում կայացած խաղը, որտեղ «Օլիմպիակոսը» պաշտպանվում էր ամբողջ թիմով: Փորձագետները հույս են հայտնում, որ «Օլիմպիակոսը» կփորձի ատամ ցույց տալ կատալոնական ակումբին, սակայն այդ դեպքում անգամ «Բարսելոնան» համարվում է ֆավորիտ:
Խաղը կմեկնարկի Երևանի ժամանակով 22:45-ին:
Սիրարփի Աղաբաբյան
