Յենս Ստոլտենբերգը ողջունել է Սիրիայում խաղաղարարության քննարկումներին մասնակցելու ՀՀ պատրաստակամությունը
ՆԱՏՕ-ի գլխավոր քարտուղար Յենս Ստոլտենբերգը ողջունել է Սիրիայում խաղաղարար գործողություններ իրականացնելու քննարկումներին մասնակցելու Հայաստանի պատրաստակամությունը: Հոկտեմբերի 17-ին լրագրողների հետ հանդիպմանը ՆԱՏՕ-ի խորհրդարանական վեհաժողովում հայաստանյան պատվիրակության ղեկավար Կորյուն Նահապետյանը նշեց, որ վեհաժողովի նստաշրջանի լիագումար նիստի ընթացքում ինքը հարց է ուղղել ՆԱՏՕ-ի գլխավոր քարտուղարին` Սիրիայում տիրող իրավիճակի և այնտեղ խաղաղարար գործողություններ իրականացնելու հնարավորությունների վերաբերյալ:
«Մեզ հետաքրքրում էր, թե ՆԱՏՕ-ն ինչ ուղղություններ է տեսնում Սիրիայում խաղաղարար գործողությունների իրականացման հարցում: Մենք նաև հայտնեցինք Հայաստանի պատրաստակամությունը նման քննարկումներին ակտիվ մասնակցելու վերաբերյալ, ինչի մասին խոսել է նաև Հայաստանի Հանրապետության Նախագահը ՄԱԿ-ի ամբիոնից: Գլխավոր քարտուղարը ներկայացրեց Սիրիայում տիրող իրավիճակը, ինչպիսին է տեսնում ՆԱՏՕ-ի դերակատարումն այնտեղ խաղաղարար գործողություններ իրականացնելու առումով: Նա ողջունեց այդ քննարկումներին մասնակցելու մեր, ինչպես նաև ՆԱՏՕ-ի անդամ և գործընկեր մյուս պետությունների պատրաստակամությունը»,- ընդգծեց Նահապետյանը:
Միևնույն ժամանակ, ՆԱՏՕ-ի գլխավոր քարտուղարն ասել է, որ այս պահին նպատակահարմար է Սիրիայում խաղաղարար գործողություններ իրականացնել ՄԱԿ-ի շրջանակներում:
