ՅՈՒՆԵՍԿՕ-ն հնարավոր է համարում Հալեպի Հին քաղաքի վերականգնումը
ՅՈՒՆԵՍԿՕ-ն գտնում է, որ Հալեպի Հին քաղաքը, որն ավերվել է «Իսլամական պետության» հետ հակամարտության ընթացքում, հնարավոր է վերականգնել: «Մեր գաղափարն է՝ վերակագնել Հին քաղաքը հենց այն տեսքով, որով նա կար մինչ պատերազմը, այն նույն քարով, որով այն կար»,- «Ռոյթեր» գործակալությանն ասել է Հալեպում ՅՈՒՆԵՍԿՕ-ի ներկայացուցիչ Մազեն Սամմանը: Նրա խոսքով, նախորդ վերականգնման ժամանակ պահպանել են Հին քաղաքի միջնադարյան մզկիթների, շուկաների, բաղնիքների և միջնաբերդերի դետալային ծրագրերը:
Միաժամանակ, ընդգծվում է, որ այդ փաստաթղթերը բավարար չեն ամբողջ շրջանի վերականգնման համար: Որպեսզի Հալեպի Հին քաղաքին վերադարձվի նախկին տեսքը՝ կպահանջվեն նաև «տեղի ջանքերը»: Տեղեկացվում է, որ ՅՈՒՆԵՍԿՕ-ի մասնագետները ծրագրում են արհեստավորների համար բացել դպրոց, որպեսզի վերակենդանացվեն նախկին գիտելիքները և հմտությունները, որոնք կնպաստեն Հին քաղաքի վերակագնմանը: «Մենք մտածում ենք արհեստավորների համար դպրոց ստեղծելու մասին»,- եզրափակել է Սամմանը:
Հալեպում խաղաղ կյանքի վերականգնումը հնարավոր է դարձել այն բանից հետո, երբսիրիական բանակը գործնականում ամբողջությամբ ԻՊ-ից ազատագրել է նահանգը և շարժվել դեպի Ռաքքա նահագի խորքը՝ Եփրատ գետի ուղղությամբ, ազատագրելով բնակելի տարածքներն ահաբեկիչներից:
Սիրիայում զինված հակամարտությունը շարունակվում է 2011 թվականի մարտից: ՄԱԿ-ի տվյալներով, այս ժամանակահատվածում զոհվել է ավելի քան 220 հազար մարդ:
