Բաժիններ՝

Կարբի գյուղի աշակերտների ստեղծած հավելվածը հաղթել է միջազգային մրցույթում

Հայաստանի դպրոցական աղջիկների կողմից պատրաստված բջջային հավելվածը հաղթող է ճանաչվել համաշխարհային մրցույթում:

Կրթության ազգային ինստիտուտի և «Կանայք և տեղեկատվական հասարակությունը» հ/կ-ի կողմից կազմակերպված «Աշխարհի խոշորագույն տեխնոլոգիական ձեռներեցության մրցույթը աղջիկների համար» համաշխարհային մրցույթի «Կրթություն» անվանակարգի եզրափակիչ փուլում հաղթող է ճանաչվել Արագածոտնի մարզի Կարբի գյուղի դպրոցի «One Step Ahead» թիմը՝ իր «Armenian Sign Language» բջջային հավելվածով:

Աղջիկները ստեղծել են հավելված, որը նախատեսված է լսողական խնդիրներ ունեցող անձանց համար: Հավելվածի միջոցով հնարավոր է ծանոթանալ տարբեր թեմաներով բառերի, ինչպես նաև սովորել թվերը: Հավելվածը հասանելի է հայերեն և անգլերեն լեզուներով:

Technovation Challenge  մրցույթի պաշտոնական էջը գրում է, որ հայ աղջիկների կողմից մշակված հավելվածը կխթանի, որպեսզի հասարակության մեջ փոխադարձաբար ինտեգրվեն թե՛ լսողության հետ խնդիրներ ունեցող, և թե՛ չունեցող մարդիկ:

Կարդացեք նաև

Կարբի գյուղը ներկայացնող  «One Step Ahead»  թիմն օգոստոսի 7-11-ը կմասնակցի Համաշխարհային գագաթաժողովին՝ ԱՄՆ-ի Սիլիկոնային հովտում:

Հիշեցնենք, որ ծրագիրը նախատեսում էր 12-շաբաթյա ուսուցում, որն իրականացվել է Կրթության ազգային ինստիտուտում: Ուսուցման ընթացքում աղջիկները սովորել են  բացահայտել, վեր հանել որևէ սոցիալական խնդիր և պատրաստել  բջջային հավելված` խնդրի լուծման նպատակով:

Ծրագրի իրականացմանն աջակցել են ՄԱԿ-ի Հայաստանյան գրասենյակը, Հայաստանի Ամերիկյան համալսարանը, Տեղեկատվական և հաղորդակցության տեխնոլոգիաների գործատուների միությունը, «Սինոփսիս-Արմենիա» ընկերությունը, «Յունիքոմփ» ընկերությունը և Ձեռնարկությունների ինկուբատոր հիմնադրամը:

Սիրարփի Աղաբաբյան

Բաժիններ՝

Տեսանյութեր

Լրահոս