«ԵԱՀԿ ՄԽ-ի հասցեական գնահատականն Ադրբեջանին ինչ-որ ժամանակ զսպիչ դերակատարություն կունենա». Ստեփան Գրիգորյան
Եվրամիության դիրքորոշումը հստակ է՝ աջակցում է ԵԱՀԿ ՄԽ նախաձեռնություններին, և այս անգամ էլ ՀՀ-ում ԵՄ դեսպանը մասամբ կրկնել է ՄԽ հայտարարությունը՝ ասելով, որ ստատուս-քվոն այլևս հնարավոր չէ պահպանել։ Նման տեսակետ 168.am-ի հետ զրույցում հայտնեց Գլոբալիզացիայի և տարածաշրջանային համագործակցության վերլուծական կենտրոնի նախագահ Ստեփան Գրիգորյանը՝ մեկնաբանելով ՀՀ-ում ԵՄ դեսպան Պյոտր Սվիտալսկու հայտարարությունը։
Ըստ նրա՝ բավականին դրական է, որ ՄԽ-ն հասցեական գնահատական հնչեցրեց Ադրբեջանի ագրեսիային՝ ասելով, որ առաջինն Ադրբեջանն է հրթիռ արձակել։ Ս. Գրիգորյանի կարծիքով՝ դա գոնե ինչ-որ ժամանակ զսպիչ մեխանիզմ կլինի Ադրբեջանի համար.
«Ավելին, այդ հայտարարությունից հետո մի քիչ շարժվեց այն հարցը, որ Կասպրչիկի դիտորդական առաքելության մեջ կարող են մի քանի հոգով ավելացնել ռազմական դիտորդների թիվը։ Դա նույնպես պատահական չէ։
Հիմա, ես կարծում եմ, դա ինչ-որ զսպիչ մեխանիզմ կլինի Ադրբեջանի համար, և որոշ առաջընթաց մենք կտեսնենք։ Թե ինչքա՞ն ժամանակ կանցնի ու նորից կսկսի կրակել Ադրբեջանը, դժվարանում եմ ասել։ Չեմ կարծում, որ երկար ժամանակ կանցնի, բայց, այնուամենայնիվ, ինչ-որ ժամանակ դա զսպիչ դերակատարություն կունենա։ Թեև ամբողջությամբ պատկերը, իհարկե, չի փոխի»։
