Խորհրդարանում Միհրան Պողոսյանի հեղինակած օրենքի նախագիծը շատ չի ուշանա
Հայաստանի Հանրապետական կուսակցության տարածքային ցուցակով Ազգային ժողովի պատգամավոր ընտրված Միհրան Պողոսյանը վստահեցնում է, որ լիարժեք պատկերացնում է խորհրդարանում իր գործունեությունը և հստակ գիտի` ինչ է անելու: Կառավարության ընդունելությունների տանը պատգամավորական մանդատների հանձնման արարողությունից առաջ լրագրողների հետ զրույցում Միհրան Պողոսյանն ընդգծեց, որ իր հեղինակած առաջին նախագիծը շատ չի ուշանալու:
«Առաջին նախագիծը, որը ես ներկայացնելու եմ, անակնկալ է ու շատ չի ուշանա: Դուք իմ գործունեության առաջին ամիսներին ականտես կլինեք իմ հեղինակած նախագծին»,- ասաց Պողոսյանը:
Միհրան Պողոսյանը խորհրդարանում իր աշխատանքը պատկերացնում է տնտեսական հարցերի կամ պետաիրավական հարցերի հանձնաժողովում, սակայն նշում է, որ կուսակցությունն է որոշելու, թե որ հանձնաժողովում ինքը կաշխատի:
Խորհրդարանում հայտնվելու Միհրան Պողոսյանի համար անակնկալ չի եղել. դա եղել է նրա ցանկությունը: Պատգամավորը վստահեցնում է, որ նոր աշխատանքի համար ուժ և մեծ եռանդ է զգում:
