Վանաձոր-Դիլիջան ավտոճանապարհի ձորակը գլորված ավտոմեքենայի վարորդը հոսպիտալացվել է
ՀՀ արտակարգ իրավիճակների նախարարությունը հունվարի 19-ին, ժամը 19.45-ին ահազանգ է ստացել, որ ՎանաձորԴիլիջան ավտոճանապարհին՝ Լերմոնտովո գյուղի մոտակայքում, տեղի է ունեցել ՃՏՊ. «ՎԱԶ 21010» մակնիշի ավտոմեքենան դուրս է եկել ավտոճանապարհի երթևեկելի հատվածից և կողաշրջվել, ավտոմեքենայի ներսում արգելափակված տուժած կա, և անհրաժեշտ է փրկարաների օգնությունը:
Դեպքի վայր են մեկնել մեկ մարտական հաշվարկ և մարզային փրկարարական վարչության օպերատիվ խումբը:
Ինչպես տեղեկացրին ՀՀ արտակարգ իրավիճակների նախարարության տեղեկատվության և հասարակայնության հետ կապերի վարչությունից, պարզվել է, որ «ՎԱԶ 21010» մակնիշի 34 UZ983 պետհամարանիշի ավտոմեքենան դուրս է եկել ավտոճանապարհի երթևեկելի հատվածից և մոտ 2 մ գլորվել մոտակա ձորակը:
Փրկարաները ավտոմեքենայից դուրս են բերել վարորդին. վերջինս հոսպիտալացվել է Վանաձորի ԲԿ:
Նախարարությունը կտրամադրի լրացուցիչ տեղեկատվություն:
