Ստամբուլը կաթվածահար է եղել ձյան առատ տեղումների հետևանքով
Ձյան առատ տեղումները պատուհասել են Թուրքիան՝ կաթվածահար անելով Ստամբուլը, որտեղ անցած գիշեր տեղացել է մոտ 65 սմ ձյուն, հայտնում է BBC-ն:
Այսօր Թուրքիայի հիմնական Turkish Airlines ավիափոխադրողը հայտարարել է Աթաթուրքի անվան օդանավակայանից 471 միջազգային չվերթի, ինչպես նաև բոլոր ներքին թռիչքների չեղարկման մասին:
Նախօրեին ավիաընկերությունը չեղարկել է 610 չվերթ Ստամբուլի միջազգային օդանավակայաններից: 
Ձյան տեղումների հետևանքով Ստամբուլի բազմաթիվ բնակիչներ չեն կարողացել դուրս գալ քաղաքից: Բազմաթիվ ավտոմոբիլիստներ ստիպված են եղել թողնել իրենց մեքենաները ու քայլել ոտքով:
Այսօր դադարեցվել է նաև շոգենավների երթևեկությունը Ստամբուլի եվրոպական ու ասիական մասերի միջև:
Հիդրոօթերևութաբանների տվյալներով՝ ցածր ջերմաստիճանը Ստամբուլում կպահպանվի մոտակա օրերին: 
