Այս տարի Երևանի 2 գյուղատնտեսական տոնավաճառները դեկտեմբերի 24-30-ը կգործեն ամենօրյա ռեժիմով
Երևանում մինչ օրս կազմակերպվել են 98 գյուղատնտեսական տոնավաճառներ, որոնց մասնակցել է շուրջ 13 հազար 700 գյուղացիական տնտեսություն: «Արմենպրես»-ի հաղորդմամբ` այս մասին դեկտեմբերի 21-ին լրագրողների հետ հանդիպման ժամանակ նշեց ՀՀ գյուղատնտեսության փոխնախարար Ռոբերտ Մակարյանը: Նրա խոսքով` այս տարի Երևանում գործարկել են երկու տոնավաճառներ ` հունիսին Կասյան փողոցում, իսկ հուլիսին Մաշտոցի պուրակի հարակից տարածքում:
«Դեկտեմբերի 24-30-ը այդ երկու տոնավաճառները նախատոնական առևտուրն իրականացնելու համար կգործեն ամենօրյա ռեժիմով` առավոտյան ժամը 09:00-ից մինչև գյուղմթերքի իրացման ավարտը»,- ասաց Մակարյանը:
