«Մենք, ԵՏՄ մտնելով, որևէ մեկի հետ ընկերություն չենք անում՝ ի վնաս ուրիշի». Կարեն Կարապետյան

ԱԺ պատգամավոր Էդմոն Մարուքյանն այսօր կառավարության հետ հարցուպատասխանի ժամանակ դիմելով վարչապետ Կարեն Կարապետյանին՝ ասաց, որ կառավարության ծրագրում Հայաստանի և Եվրամիության համագործակցությունը շատ ավելի ցածր մակարդակում է արձանագրել, քան այն, ինչ ունենք:

«Գաղտնիք չէ, որ մինչև ԵՏՄ-ին անդամակցելը Հայաստանի ունեցած բազմաթիվ ձեռքբերումները կապված են եղել ԵՄ-ի հետ համագործակցության հետ: Կառավարության ծրագրում մի շարք այլ երկրների հետ համագործակցությունից հետո է արձանագրվել Հայաստան-Եվրամիություն հարաբերությունները»,- ասաց պատգամավորը, ապա վարչապետին խնդրեց ներկայացնել կառավարության տեսլականը ՀՀ-ԵՄ համագործակցության տեսանկյունից:

Պատգամավորի հարցին վարչապետն այսպես պատասխանեց. «Ձեզ մի գաղտնիք բացեմ՝ այդ հավելվածը ներկայացրել է ԱԳՆ-ն, այդ հավելվածը նախկին ծրագրերից չի տարբերվում. մի տարբերություն՝ այս անգամ համարակալել են, մնացած անգամներն ուղղակի դիմացը տող է գրված եղել: Ճիշտ չենք արել և մենք պատրաստ ենք ձեր այս հարցը քննարկել: Եթե այս ամբիոնն օգտագործում ենք, որպեսզի ԵՄ մեր գործընկերները լսեն, ասեմ՝ իրականում իրենք շատ մեծ դոնոր և ներդրող են, ու մենք պետք է իրենց համապատասխան վերաբերմունք ցույց տանք: Մենք, ԵՏՄ մտնելով, որևէ մեկի հետ ընկերություն չենք անում՝ ի վնաս ուրիշի: ԵՏՄ մտնելով՝ մենք մեզ սահմանափակե՞լ ենք՝ ԵՄ-ի հետ առնչվելու, առևտուր անելու, շփվելու, ինվեստիցիա անելու. չէ՛ իհարկե: Կառավարության մյուս ծրագրերում էլ ԵՄ մասը նույն տեղում է, ուղղակի 14 թիվը ֆիքսված չէ. համենայնդեպս, ԱԳՆ-ից ինձ այդպես են պատասխանել: Ավելին, մենք շատ բաց խոսել ենք ԵՄ մեր գործընկերների հետ, որոնք նման մտավախություն նաև հնչեցրել էին: Իսկ լրացուցիչ անգամ մեր դաշտում այդ մասին խոսելը, չեմ կարծում, որ ճիշտ է: Չնայած՝ դուք այդ իրավունքը միշտ էլ ունեք»:

Է. Մարուքյանը նկատեց, որ Տիգրան Սարգսյանի կառավարության ծրագրին կողմ է քվեարկել, որովհետև այնտեղ նշված է եղել, որ Հայաստանն ավարտին է հասցնելու ԵՄ-ի հետ ասոցիացման համաձայնագիրն ու ստորագրելու է այն. «Այսինքն՝ այլ դրույթներ են արձանագրված եղել, և ինձ մոտ տպավորություն կա, որ մենք ինքնագրաքննությամբ ենք նաև զբաղված: Ես նաև տեսնում եմ, որ Շրջանակային համաձայնագիրն արհեստական ձգձգումներով չենք ստորագրում, ինչը նույնպես բխում է այդ համագործակցության ցածր մակարդակից»:

Վարչապետն ասաց, որ, եթե նման մտավախություն կա, ապա ինքը միշտ բաց է դրա մասին խոսել. «Բայց հարթակներն էլ հասկանանք՝ որտեղ ինչ հարց բարձրացնենք, եթե դեմ չեք, իհարկե»:

Տեսանյութեր

Լրահոս