Օբաման չի բացառել, որ իր աղջիկները կարող են ծառայել բանակում
ԱՄՆ նախագահ Բարաք Օբաման հայտարարել է, որ չի խոչընդոտի իր դուստրերի՝ բանակում ծառայելու ցանկությանը։
Նման հայտարարություն Օբաման արել է Վիրջինիա նահանգում՝ Ֆորտ-Լի ցամաքային զորքերի ռազմաբազայում, զինվորականների ու նրանց հարազատների հետ հանդիպմանը, որը հեռարձակել է CNN հեռուստաալիքը։
«Ես կասեի՝ գործե՛ք: Անկասկած, ես կստեի՝ ասելով, թե չէի նյարդայնանա նրանց ծառայության հնարավոր վայրի առնչությամբ։ Ձեր երեխաները ձեր երեխաներն են, ու եթե լիներ նման հնարավորություն, դուք նրանց գիշերազգեստներով էլ կթողնեիք ողջ կյանքում»,- Reuters-ը մեջբերել է ԱՄՆ-ի նախագահի խոսքերը։
ԱՄՆ նախագահը կոչ է արել, որ մեծ թվով ամերիկացիներ ընդունվեն ռազմական ծառայության։ Մասնավորապես, նրա խոսքով, դա վերաբերում է «մեծ եկամուտ ունեցող մարդկանց»։
Օբամայի մեծ դուստրը՝ Մալիան, 18 տարեկան է, Սաշան՝ 15։
