Հովհաննես Համբարձումյանը բաց կթողնի Հայաստանի հավաքականի առաջիկա խաղերը
Մակեդոնական «Վարդար»-ի և Հայաստանի ազգային հավաքականի պաշտպան Հովհաննես Համբարձումյանն, ամենայն հավանականությամբ, բաց կթողնի Հայաստանի ազգային հավաքականի առաջիկա հանդիպումները: Ինչպես հաղորդում է մակեդոնական ակումբի պաշտոնական կայքը, 25-ամյա պաշտպանը խորացրել է նախկինում ունեցած վնասվածքը:
Համբարձումյանը չի մասնակցել նաև այսօր կայացած «Վարդար»-«Պելիստեր» հանդիպմանը, որն ավարտվել է 1:1 հաշվով: Հայաստանի ազգային ընտրանու գլխավոր մարզիչ Վարուժան Սուքիասյանն օրեր առաջ հրապարակել էր լեգեոներների ցուցակը, որոնք նախապատրաստվելու էին հավաքականի առաջիկա հանդիպումներին: Սուքիասյանը հրավիրել էր նաև Համբարձումյանին:
Հոկտեմբերի 8-ին Հայաստանի ընտրանին Երևանում հյուընկալելու է Ռումինիայի հավաքականին, իսկ երեք օր անց մրցակցի հարկի տակ հանդիպելու է Լեհաստանի հավաքականին:
