Մերկելը ստանձնել է Բեռլինի ընտրություններում իր կուսակցության պարտության պատասխանատվությունը
Գերմանիայի կանցլեր Անգելա Մերկելը ստանձնել է իշխող «Քրիստոնեա-դեմոկրատական միություն» կուսակցության պարտությունը Բեռլինի խորհրդարանի ընտրություններում։
Խոստովանելով, որ Գերմանիայի կառավարության քաղաքականությունը ներգաղթյալների նկատմամբ դարձել է գործոն պարտության հարցում, Մերկելը ասել է, որ չգիտի, թե ինչ փոփոխություն է ներգաղթյալների քաղաքականության հարցում ցանկանում ժողովուրդը, տեղեկացնում է BBC-ն։
«Եթե ես կարողանայի, ժամանակը հետ կտայի»,- հայտարարել է Մերկելը՝ ափսոսանք հայտնելով, որ կառավարությունը ավելի շատ ժամանակ չի ունեցել Եվրոպայում ներգաղթյալների հոսքին պատրաստվելու համար։
«Եթե ես իմանայի, թե հատկապես ինչ փոփոխություններ են մարդիկ ցանկանում քաղաքականությունում, պատրաստ կլինեի դրանք քննարկել»,- ասել է Մերկելը՝ մեկնաբանելով վերջերս անցկացված հարցման արդյունքները, որոնց համաձայն՝ մարդկանց 82 տոկոսը հայտարարել էր, թե ցանկանում է փոփոխություններ կառավարության միգրացիոն քաղաքականությունում։
Հիշեցնենք, որ նախօրեին Մերկելի գլխավորած «Քրիստոնեա-դեմոկրատական միություն» կուսակցությունը հավաքել է ռեկորդային ցածր 17.6% տոկոս և դուրս մնացել Բեռլինի կոալիցիոն կառավարությունից։
Գերմանիայի «Քրիստոնեա-դեմոկրատական միություն» կուսակցությունը և Սոցիալ-դեմոկրատների իշխող կոալիցիան կորցրել են ձայների մեծ մասը Բեռլինի խորհրդարանում։
Ընտրությունները տեղի էին ունեցել Բեռլինում կիրակի օրը։ Ներկայումս Մերկելի կուսակցությունը Բեռլինի խորհրդարանում ունի 39 տեղ։
