ԱՄՆ-ը 38 մլրդ դոլարի ռազմական օգնություն կցուցաբերի Իսրայելին
ԱՄՆ-ը և Իսրայելը վերջնականապես համաձայնեցրել են ամերիկյան ռազմական օգնության նոր փաթեթը, որը նվազագույնը 38 մլրդ դոլար է։ Ինչպես սպասվում է, համաձայնագիրը կստորագրվի մոտ օրերս, հայտնում է Reuters-ը՝ հղում կատարելով իրավիճակին մոտ կանգնած աղբյուրներին։
Գործակալության տեղեկություններով՝ 10 տարի ժամկետով համաձայնագիրը նախատեսում է Իսրայելին տրամադրել տարեկան նվազագույնը 3,8 մլրդ դոլար։
Ինչպես հայտնի է դարձել գործակալությանը, նոր պայմանավորվածություններն առաջին անգամ կմիավորեն միջոցները՝ նախատեսված իսրայելական հակահրթիռային պաշտպանության համար։
Տվյալ գործարքը խոշորագույն համաձայնագիր է, որով ԱՄՆ-ը ինչ-որ պետության ցուցաբերում է նման խոշոր չափի ռազմական օգնություն, այն նախատեսում է նաև զիջումներ Իսրայելի կողմից։ Մասնավորապես, խոսքն այն պայմանավորվածության մասին է, որի համաձայն՝ Իսրայելը հավելյալ միջոցներ չի խնդրի ԱՄՆ Կոնգրեսից։
