Գալուստ Սահակյանը բաց դաս է վարել
Սեպտեմբերի 13-ին ԱԺ «Բաց դռներ» ծրագրի շրջանակում ՀՀ Ազգային ժողով էին այցելել Երեւանի Ալեքսանդր Պուշկինի անվան թիվ 8 հիմնական դպրոցի մի խումբ ուսուցիչներ եւ աշակերտներ: Բաց դասը վարել է ՀՀ ԱԺ նախագահ Գալուստ Սահակյանը: Ողջունելով ներկաներին՝ ԱԺ նախագահը նշել է, որ խորհրդարանն այն վայրն է, որտեղ քաղաքական ուժերը, միմյանց հետ բանավիճելով, կարողանում են գտնել տարբեր ոլորտներին վերաբերող հարցերի լավագույն լուծումները:
Գալուստ Սահակյանը նշել է, որ ՀՀ Սահմանադրությունը երկրի հիմնական օրենքն է, որից բխում են մյուս օրենքները եւ Ազգային ժողովն իր նիստերը վարում է ըստ սահմանադրական դրույթների:
Ծավալված անկաշկանդ զրույցի ընթացքում աշակերտներն իրենց հետաքրքրող հարցերն են ուղղել ԱԺ նախագահին, որոնց նա սիրով պատասխանել է:
Հարցերը հիմնականում վերաբերել են օրենսդրական նախաձեռնությունների ներկայացման եւ քննարկման ընթացակարգերին, տնտեսության զարգացման եւ ներդրումների խրախուսման ուղղությամբ իրականացվող քայլերին:
Խորհրդարանի ղեկավարն աշակերտներին հորդորել է լավ սովորել, ստանալ որակյալ կրթություն եւ ընտրած ոլորտում դառնալ լավագույն մասնագետները:
Նշենք, որ հանդիպումից առաջ աշակերտները շրջել են խորհրդարանում, ներկա գտնվել ԱԺ քառօրյա նիստին:
Այցի ավարտին ուսուցիչները եւ աշակերտները լուսանկարվել են ՀՀ ԱԺ նախագահի հետ:
