Գլխավոր դատախազի թեկնածուն հայտնի է. «Հայկական ժամանակ»
«Հայկական ժամանակ» թերթի տեղեկություններով՝ ՀՀ նոր գլխավոր դատախազը լինելու է գլխավոր դատախազի տեղակալ Արթուր Դավթյանը։ Վերջինս, հիշեցնենք, Գևորգ Կոստանյանի հրաժարականից հետո օգոստոսի 4-ին նշանակվեց գլխավոր դատախազի ժամանակավոր պաշտոնակատար։ Նույն օրն էլ, սակայն, նա ազատվեց այդ պաշտոնից։ Փոխարենը պաշտոնակատար նշանակվեց գլխավոր դատախազի մեկ այլ տեղակալ Արմեն Հարությունյանը։
«Բանն այն է, որ Արթուր Դավթյանին նշանակելիս մոռացել էին Դատախազության մասին ՀՀ օրենքի այն պահանջը, որ գլխավոր դատախազի պաշտոնակատար պետք է նշանակվի տեղակալներից տարիքով ավագը։ Մեր տեղեկություններով, Արթուր Դավթյանն այսօր արդեն Ազգային ժողովում կհանդիպի խմբակցությունների հետ։ Այնուհետև խորհրդարանը Գևորգ Կոստանյանի հրաժարականն ընդունելուց հետո կկազմակերպի նոր գլխավոր դատախազի ընտրությունները։
Հիշեցնենք, նոր Սահմանադրությամբ և «Դատախազության մասին» ՀՀ օրենքով նախատեսված է, որ Գլխավոր դատախազին Հանրապետության նախագահի առաջարկությամբ նշանակում է Ազգային ժոդովը՝ 6 տարի ժամկետով։ Նույն անձը չի կարող ավելի քան երկու անգամ անընդմեջ նշանակվել գլխավոր դատախազ»:
Ամբողջությամբ կարող եք կարդալ «Հայկական Ժամանակ» թերթի այսօրվա համարում:
