Զուգդիդիում Սաակաշվիլիի կնոջը փորձել են խանգարել անցկացնել ընտրարշավը
Վրաստանի Զուգդիդիի Ջիհարշքարի գյուղում երկրի նախկին նախագահ Միխայիլ Սաակաշվիլիի կնոջ` Սանդրա Ռուլովսի և տեղի բնակիչների հետ հանդիպմանը տհաճ միջադեպ է տեղի ունեցել, հայտնում է «Գրուզիա օնլայնը»:
Նշվում է, որ մի քանի անհայտ անձ փորձել է խափանել նրա ելույթը, սակայն բնակիչները նրանց դա թույլ չեն տվել:
Ընդդիմադիր «Միասնական ազգային շարժում» կուսակցության անդամների խոսքով` դեպքը կազմակերպվել է իշխող «Վրացական երազանք» կուսակցության կողմից, իսկ ակտիվիստները նման հանձնարարություն են ստացել Սամեգրելո-Զեմո Սվանեթիի նահանգապետ Լևան Շոնիայից:
Սանդրա Ռուլովսը Վրաստանի խորհրդարանական ընտրություններում, որոնք տեղի կունենան հոկտեմբերի 8-ին, երկրորդը կլինի «Միասնական ազգային շարժում» կուսակցության ընտրական ցուցակում:
Ռուլովսը, որը որոշել է զբաղվել քաղաքականությամբ, պատգամավորի թեկնածուի պաշտոնի համար «Ազգային շարժում» կուսակցությունից ներկայացվել է Զուգդիդի շրջանի մեծամասնական ընտրատարածքում:
