Թուրքական ԶԼՄ-ները` երկրի ՆԳՆ ղեկավարի հրաժարականի պատճառների մասին
Թուրքիայի նախագահ Ռեջեփ Էրդողանը դժգոհ է եղել երկրի ներքին գործերի նախարար Էֆկան Ալայի գործունեությունից, հենց այդ պատճառով է նա հրաժարական ներկայացրել, գրում է թուրքական Hürriyet թերթը:
Տեղեկությունների համաձայն` Թուրքիայում ռազմական հեղաշրջման փորձից անմիջապես հետո Ալան նշել էր, որ երկրի հետախուզության 7 հազար աշխատակիցներից մոտ 6.5 հազարը Ֆեթուլլահ Գյուլենի շարժման կողմնակիցներ են, և այդ տեղեկությունը չափազանց բացասաբար էր ընդունվել Թուրքիայի կառավարության կողմից:
Ալայի հրաժարականի մեկ այլ պատճառ է նշվում նաև այն, որ ռազմական հեղաշրջման փորձի օրը հնարավորություն չի եղել կապ հաստատել երկրի ՆԳՆ ղեկավարի հետ:
Թերթի տվյալներով` այդ օրն Ալան գտնվել է Էրզրում նահանգում, այլ ոչ թե Անկարայում:
