Կադաստրում գործելու է գնահատման նոր համակարգ
ՀՀ կառավարությանն առընթեր անշարժ գույքի կադաստրի պետական կոմիտեի «Կենտրոն» սպասարկման գրասենյակում օգոստոսի 31-ին տեղի ունեցավ էլեկտրոնային գնահատման նոր համակարգի ներդրման շնորհանդեսը: Այս մասին տեղեկացնում են Կադաստրի պետական կոմիտեից:
Կադաստրի համակարգի կողմից բնակչությանը մատուցվող ծառայությունների որակն առավել բարելավելու նկատառումներով, Երևան քաղաքում գործող սպասարկման գրասենյակներում ներդրվում է էլեկտրոնային գնահատման նոր համակարգ, որը քաղաքացիներին հնարավորություն կտա գնահատելու սպասարկման գրասենյակների կողմից մատուցվող ծառայությունների որակը, ինչն էլ իր հերթին կնպաստի վեր հանել այդ բնագավառում կադաստրի համակարգի հնարավոր բացերը:
«Համալիր և շարունակական բարեփոխումները միտված են համակարգի կողմից իրականացվող գործառույթների թափանցիկության բարձրացմանը, վարչարարության պարզեցմանը, առկա թերությունների հայտնաբերմանը, ինչպես նաև հանրային վերահսկողության ապահովմանը, որը կնպաստի քաղաքացիների սպասարկման նոր որակի ապահովմանը»,- լրագրողների հետ ճեպազրույցի ժամանակ նշեց ԿԱ անշարժ գույքի կադաստրի պետական կոմիտեի նախագահ Մարտին Սագսյանը:
Նա նշեց, որ համակարգը հնարավորություն կընձեռնի գնահատել և խրախուսել աշխատակիցներին, ովքեր իրենց վստահված աշխատանքը կատարում են մեծ պատասխանատվությամբ և բարեխղճորեն, այնպես էլ կիրառել պատժամիջոցներ այն աշխատակիցների նկատմամբ, ովքեր թերանում են: Սա այն գործիքն է լինելու համակարգի ներսում, որի շնորհիվ քաղաքացին ինքն է գնահատելու կադաստրի համակարգի աշխատանքը:
Նորարարությունը հաջողությամբ գործարկվելու դեպքում, առաջիկայում այն կներդրվի նաև մարզերում գործող սպասարկման գրասենյակներում:
Մարտին Սարգսյանը տեղեկացրեց, որ գնահատման համակարգի ներդրման համար անհրաժեշտ շուրջ 5 մլն դրամ ծախսից պետական ֆինանսական միջոցներ են ներդրվել շուրջ 700.000 դրամ, մնացած ծախսերը իրականացվել են բարեգործության շրջանակում ձեռքբերված միջոցների հաշվին:
