«Ադրբեջանը ապագայում զգալի կընդլայնի գազի արտահանման հնարավորությունները». Ալիև
Ադրբեջանի նախագահ Իլհամ Ալիևն այսօր ընդունել է Գազ արտահանող երկրների ֆորումի գլխավոր քարտուղար Մոհամմադ Հուսեին Ադելիին, հայտնում է ադրբեջանական Trend գործակալությունը:
Հանդիպումը տեղի է ունեցել «Կասպյան տարածաշրջանի զարգացող էներգետիկա, էկոնոմիկա. Փոփոխություններ ու հնարավորություններ» եվրասիական առաջին համաժողովի շրջանակներում:
Ալիևը նշել է, որ «Շահ Դենիզ-2» նախագծով աշխատանքները հաջողությամբ են ընթանում, և մոտակա տարիներին Ադրբեջանում գազի արդյունահանումը զգալի կավելանա:
Նա տեղեկացրել է, որ մոտ ապագայում գազ է սկսելու արդյունահանվել նաև «Ապշերոն» նախագծի շրջանակներում, ինչը զգալի կընդլայնի գազարտահանման հնարավորությունները:
Նշվում է, որ զրույցի ընթացքում կողմերը կարծիքներ են փոխանակել գազային և էներգետիկ շուկաների միտումների, գազի արտահանման արդյունավետության բարձրացման մասին, կարևորվել է Ադրբեջանի և Գազ արտահանող երկրների ֆորումի երկրների համագործակցության խորացումը:
