ԱՄՆ-ն առևտրային առաքելություն կուղարկի Ադրբեջան
ԱՄՆ-ի առևտրային առաքելությունը սեպտեմբերի 15-16-ը կայցելի Ադրբեջան, հայտնում է haqqin.az-ը` հղում կատարելով Ամերիկա-ադրբեջանական առևտրային պալատին (USACC):
Առաքելությունը կազմակերպվել է Կոլումբիայի շրջանի դեպարտամենտի մանր և տեղական բիզնեսի աջակցության օժանդակությամբ (ExportDC):
Պատվիրակության կազմում կներառվեն մանր և միջին ընկերությունների ներկայացուցիչներ, որոնք գործում են կայուն զարգացման, ռազմավարական և խորհրդատվական ծառայությունների, առողջապահության, քաղաքային պլանավորման, IT ոլորտներում և այլն:
Այցի շրջանակում հանդիպումներ են կայանալու կառավարության և մասնավոր ոլորտի ներկայացուցիչների հետ:
Ադրբեջանի Մաքսային միության տվյալներով` ԱՄՆ-ի հետ առևտրաշրջանառությունը հունվար-հուլիսին կազմել է գրեթե 312,3 մլն դոլար, որից 280,6 մլն դոլարը բաժին է ընկել ամերիկյան արտադրանքի ներկրմանը:
