Պայթյուն Բիշքեկում` Չինաստանի դեսպանատան մոտ
Հզոր պայթյուն է որոտացել Բիշքեկքում Չինաստանի դեսպանության մոտ, կա 1 զոհ, դիվանագիտական ներկայացուցչության անվտանգության 2 աշխատակից վնասվածքներ է ստացել, հայտնում է RIA Novosti-ն:
Երկրի ներքին գործերի գլխավոր վարչության մամուլի ծառայությունից հայտարարել են, որ արտակարգ դեպքի մասին լուրն ստացվել է տեղի ժամանակով ժ. 10.00-ի սահմաններում (Երևանի ժամանակով ժ. 08.00-ին):
Ներկայում դեպքի վայրում աշխատում են ոստիկանները:
Ականատեսներից մեկը գործակալությանը պատմել է, որ պայթուցիկով լի ավտոմեքենան ներխուժել է դեսպանության տարածք և պայթել դեսպանի նստավայրից ոչ հեռու:
Պայթյունի հետևանքով կոտրվել են հարևան տների ապակիները, խանութներում վնասվել են ցուցափեղկերը:
Ղրղըզստանի առողջապահության նախարարությունից հայտնել են, որ պայթյունի վայրում հայտնաբերվել է մեքենայում գտնվող մարդու մարմին: Ներկայում պարզվում է նրա ինքնությունը:
Ղրղըզստանի փոխվարչապետ Ժենիշ Ռազակովը հայտարարել է, թե պայթյունը Չինաստանի դեսպանության տարածքում իրականացրել է մահապարտ ահաբեկիչը:
Դեսպանության աշխատակիցներից ոչ ոք չի տուժել:
