«Ներկայում Ադրբեջանը դիտարկում է Եվրոպա իրանական գազի տարանցման հնարավորությունը TANAP-ի միջոցով». ադրբեջանցի փոխնախարար
Ադրբեջանը չի բացառում իրանական և իրաքյան գազի տարանցումը Եվրոպա իր տարածքով TANAP գազատարի միջոցով: Ադրբեջանական APA գործակալության հաղորդմամբ` այս մասին հայտարարել է Ադրբեջանի էներգետիկայի փոխնախարար Նատիգ Աբասովը Էներգետիկայի էկոնոմիկայի միջազգային ասոցիացիայի (IAEE) Եվրասիական առաջին համաժողովի ժամանակ:
Նրա խոսքով` Ադրբեջանը Տրանսանատոլիական գազատարի (TANAP) շինարարության նախագծի նախաձեռնողներից է:
«Ներկայում Ադրբեջանը դիտարկում է իրանական գազի տարանցման հնարավորությունը իր տարածքով Եվրոպա` TANAP գազատարին միանալու միջոցով: Իրանի և Ադրբեջանի միջև կան համապատասխան ենթակառուցվածքներ, որի օգնությամբ հնարավոր է իրականացնել գազի տարանցում Ադրբեջանի միջոցով Իրանից և անգամ Իրաքից ТANAP-ով դեպի Եվրոպա»,- ասել է նա:
