Թուրքիայի քրդամետ կուսակցությունը դատապարտել է Սիրիայում Անկարայի գործողությունները
Քրդամետ «Ժողովուրդների դեմոկրատիա» կուսակցությունը «սխալ» է որակել ռազմական օպերացիան, որը երկրի զինված ուժերն իրականացնում են Սիրիայի հյուսիսում:
«Թուրքիայի վերջին գործողություններն ակնհայտորեն ցույց են տալիս, որ Սիրայի նկատմամբ նրա վերջին հնգամյա քաղաքականությունը ձախողվել է: Իրերի նման դասավորությունը փոխելու համար Թուրքիան կտրուկ շրջադարձ է կատարում, սակայն նոր քաղաքականությունը նույնքան սխալ է, որքան նախորդը:
Թուրքիան չպետք է միջամտի սիրիական գործերին ռազմական մեթոդներով, հատկապես պետք է հրաժարվի Սիրիայում հակաքրդական դիրքորոշումից: Այն հաշվարկները, թե Ջարաբլուսի օկուպացիայից հետո Թուրքիան կարող է այնտեղ երկար մնալ դե-յուրե և դե-ֆակտո, սխալ են»,- ասվում է «Ժողովուրդների դեմոկրատիա» կուսակցության տարածած հայտարարության մեջ:
Փաստաթղթում նշվում է, որ Թուրքիան փաստացի ներքաշվել է Սիրիայի պատերազմի մեջ:
«Որպեսզի երկրում խաղաղություն հաստատվի, անհրաժեշտ է շտապ վերադառնալ քրդական կարգավորման գործընթացին և հարաբերություններր կառուցել քրդերի հետ և արտերկրի մյուս ժողովրդավարական ուժերի հետ»,- ավում է քրդամետ կուսակցության հայտարարության մեջ:
