Մյանմայում տեղի ունեցած երկրաշարժից 190 հին բուդդայական պագոդաներ են վնասվել
Մյանմայի կենտրոնական մասում օգոստոսի 24-ին տեղի ունեցած 6,8 մագնիտուդով երկրաշարժն ավերել կամ լրջորեն վնասել է 190 հին բուդդայական պագոդաներ, որոնք ճարտարապետության հուշարձաններ են: Այս մասին հայտնել է The Global New Light Of Myanmar կառավարական թերթը:
Նրա տվյալներով՝ առավել շատ պաշտամունքային շինություններ են վնասվել Բագան քաղաքում, որտեղ գտնվում են մի քանի հազար բուդդայական պագոդաներ ու տաճարներ, որոնք կառուցվել են 11-14-րդ դարերում: Վնաս է հասցվել նաեւ Ռաքայն արեւմտյան նահանգում գտնվող բուդդայական սրբավայրերին: «Բագանում վնասվել է 185 պագոդա, վնասի չափերի վերաբերյալ վերջնական տվյալները դեռեւս ճշտվում են»,- նշում է հրատարակությունը:
Երկրաշարժի էպիկենտրոնը գտնվում էր Չաու բնակավայրից մի քանի կիլոմետր արեւմուտք ընկած շրջանում՝ Բագան քաղաքից ոչ հեռու: Ստորգետնյա ցնցումների հետեւանքով զոհվել է չորս մարդ, այդ թվում՝ երկու երեխա:
Մյանմայում տեղի ունեցած երկրաշարժից ստորգետնյա ցնցումներն զգացվել են երկրի խոշորագույն քաղաքում՝ Յանգոնում, ինչպես նաեւ տարածաշրջանի ընդարձակ տարածքում, Բանգլադեշի մայրաքաղաքում եւ Հնդկաստանի մի շարք նահանգներում, մասնավորապես, Արեւմտյան Բենգալիայում եւ Ասամում, հաղորդել է ՏԱՍՍ-ը:
