Պուտին-Էրդողան հանդիպմանը սեղանին դրվել են նրանց նկարներով ափսեներ
Երեկ Սանկտ Պետերբուրգի Կոնստանտինյան պալատում Ռուսաստանի և Թուրքիայի նախագահներ Վլադիմիր Պուտինի և Ռեջեփ Էրդողանի հանդիպումը հիշվել է ոչ միայն քաղաքական որոշումներով, այլև անսովոր հուշանվերներով, գրում է mk.ru-ն:
Հանդիպումը լուսաբանող լրագրող Դմիտրի Սմիրնովը նկատել է, որ ռուս և թուրք պաշտոնյաների դիմաց դրված են եղել Պուտինի և Էրդողանի նկարներով ափսեներ:
Նա նշել է, որ ափսեներն օգտագործվել են «ճաշի ձևաչափով» բանակցությունների ժամանակ: Ի դեպ, ներկաներից ոչ ոք չի համարձակվել ափսեների վրա ուտելիք դնել:
Հիշեցնենք, որ մինչ այդ երկու երկրների ղեկավարները հանդիպել էին «տեսախցիկների ներքո», իսկ հետո հանդես եկել համատեղ մամուլի ասուլիսով:
Համացանցում դեռևս շարունակվում են այդ ափսեների թեմայով ծաղրական մեկնաբանությունները:
