Ալիևը շնորհակալություն է հայտնել Պուտինին Ղարաբաղի հակամարտության կարգավորման հարցում ակտիվ մասնակցության համար
Ադրբեջանի նախագահ Իլհամ Ալիևը Բաքվում ՌԴ նախագահ Վլադիմիր Պուտինի հետ հանդիպմանը շնորհակալություն է հայտնել Պուտինին Լեռնային Ղարաբաղի հակամարտության կարգավորման հարցում ակտիվ մասնակցության համար, հայտնում է RIA Novosti գործակալությունը:
«Կցանկանայի հատկապես ընդգծել Ռուսաստանի դերը Լեռնային Ղարաբաղի հակամարտության կարգավորման հարցում»,- հայտարարել է Ալիևը:
Նա հիշեցրել է, որ հունիսին Սանկտ Պետերբուրգում կայացած հանդիպումը նվիրված է եղել այդ խնդրին: «Ես շնորհակալություն եմ հայտնում Ձեզ այդ գործընթացում Ձեր անձնական ակտիվ մասնակցության համար»,- ասել է Ալիևը:
Նրա խոսքով` Ռուսաստանի և Ադրբեջանի նախագահների հաճախակի հանդիպումները նոր ազդակ են հաղորդում երկկողմ հարաբերություններին, «որոնք արդեն վաղուց դուրս են եկել ռազմավարական համագործակցության մակարդակ և ընդգրկում են բոլոր ոլորտները»:
«Մենք ակտիվորեն համագործակցում ենք միջազգային հարթակներում, ամրապնդվում է քաղաքական երկխոսությունը, ամրապնդվում են երկկողմ կապերը»,- ասել է Ալիևը:
