Վրաստանի նորանշանակ պաշտպանության նախարարն ուսումնասիրում է Խիդաշելիի` պարտադիր զորակոչը չեղյալ հայտարարելու որոշումը
Ինչպես հայտարարել է Վրաստանի նորանշանակ պաշտպանության նախարար Լևան Իզորիան, ներկայումս ուսումնասիրվում է երկրի պաշտպանության նախկին նախարար Թինաթին Խիդաշելիի` երկրում պարտադիր զորակոչը չեղյալ հայտարարելու որոշումը, տեղեկացնում է «Գրուզիա օնլայնը»:
Վրացի նախարարը լրագրողներին հայտնել է, որ դրա համար որոշ ժամանակ է անհրաժեշտ, և վերջնական որոշումը հասարակությունն ավելի ուշ կիմանա:
«Ես չեմ եկել գերատեսչություն նախնական մտադրություններով և որոշումներով, այդ թվում` կապված այդ հարցի հետ: Կատարվում է տվյալ հարցի ուսումնասիրություն: Անհրաժեշտ է որոշակի ժամանակ, և վերջնական որոշումը առաջինը դուք կիմանաք»,- ասել է Իզորիան լրագրողներին:
Վրաստանի արդեն նախկին պաշտպանության նախարար Թինաթին Խիդաշելին հուսով է, որ գերատեսչության նոր ղեկավարը չի վերանայի ակտը, որը երկրում չեղյալ է հայտարարում պարտադիր զինվորական ծառայությունը:
Հիշեցնենք, որ ամիսներ առաջ Վրաստանի պաշտպանության նախարարը հրաման էր
ստորագրել երկում պարտադիր զինվորական ծառայությունը չեղարկելու մասին:
«Վրաստանի զինված ուժերում ծառայելը արժանապատիվ գործ է, և բոլորը պետք է ցանկանան ծառայել: Սակայն, ով չի ցանկանում, մենք չենք ստիպելու»,- ասել էր վրացի նախարարը:
