«ԵԱՀԿ ՄԽ համանախագահները պատրաստ են ցանկացած պահի այցելել Անկարա». Ջեյմս Ուորլիք
ԵԱՀԿ Մինսկի խմբի համանախագահները պատրաստ են ցանկացած պահի այցելել Անկարա՝ հանդիպելու Թուրքիայի բարձրաստիճան պաշտոնատար անձանց հետ, և սպասում են կոնկրետ հրավերի:
Ադրբեջանական APA գործակալության հաղորդմամբ` այս մասին լրատվամիջոցի հետ զրույցում հայտարարել է ԵԱՀԿ Մինսկի խմբի ամերիկացի համանախագահ Ջեյմս Ուորլիքը` պատասխանելով Անկարա այցին վերաբերող հարցին:
«Լեռնային Ղարաբաղի հակամարտության խաղաղ կարգավորման շուրջ խորհրդակցությունների անցկացման նպատակով արդեն այցելել ենք Մինսկի խմբի անդամ բոլոր երկրների մայրաքաղաքներ:
Մենք բարձր ենք գնահատում հնարավորությունը` կարծիքներ փոխանակել Թուրքիայի պաշտոնատար անձանց հետ, նրանց աջակցությունը՝ ուղղված ԼՂ բանակցային գործընթացում առաջընթացի հասնելուն և բռնության ռիսկերի նվազեցմանը»,- հայտնել է Ուորլիքը:
Հիշեցնենք, որ ԵԱՀԿ Մինսկի խմբի համանախագահների այցն Անկարա նախատեսված էր հուլիսի 18-ին, սակայն Թուրքիայում ռազմական հեղաշրջման փորձի պատճառով այցը անորոշ ժամանակով հետաձգվել էր:
