Լոնդոնում ահաբեկչական սպառնալիքի պատճառով կավելանա զինված ոստիկանների թիվը
Լոնդոնի փողոցներում կավելանա զինված ոստիկանների թիվը, հայտնել են Լոնդոնի քաղաքապետ Սադիկ Խանն ու Լոնդոնի ոստիկանության ղեկավար, սըր Բեռնարդ Հոգան-Հոուն, հայտնում է BBC-ն:
Քաղաքի իշխանությունները նման քայլերի են դիմել Եվրոպայում ծայրահեղականների հաճախակի դարձած հարձակումների հետևանքով, մասնավորապես Ֆրանսիայի Լազուրե ափում տեղի ունեցած ահաբեկչությունից հետո:
«Հարձակումներ են տեղի ունեցել Գերմանիայում, Բելգիայում, Ֆրանսիայում, և մեր կողմից հիմարություն կլիներ դա անտեսելը, այդ պատճառով կարևոր է, որ փողոցներում լինեն զինված սպաներ, որոնք կկարողանան պատասխանել սպառնալիքներին»,- հայտարարել է Հոգան-Հոուն:
Նրա խոսքով` զինված ոստիկանները շուրջօրյա պարեկություն կանեն քաղաքի որոշ շրջաններում: Առաջին հերթին խոսքը զբոսաշրջային տեսարժան վայրերի և մարդկանց կուտակումների վայրերում:
«Շատ կարևոր է, որ լոնդոնցիները վստահ լինեն, որ ոստիկանությունն ու անվտանգության ծառայություններն անում են ամեն ինչ` նրանց անվտանգությունն ապահովելու համար»,- հայտարարել է Սադիկ Խանը:
