ԱՄՆ-ի պետքարտուղարության հայտարարությունը Երևանի ներկայիս իրավիճակի վերաբերյալ
ԱՄՆ-ի պետքարտուղարությունը հայտարարություն է տարածել Երևանի ներկայիս իրավիճակի մասին, որը վերաբերում է «Սասնա ծռեր» զինյալ խմբի կողմից զենքերը վայր դնելուն, լրագրողների նկատմամբ բռնությունների կիրառմանը: Հայտարարության մեջ կոչ է արվում Ոստիկանության ՊՊԾ շենքի գրավմանը մասնակցած անձանց նկատմամբ ցուցաբերել «հավասար և արդար վերաբերմունք»:
ԱՄՆ պետքարտուղարության հայտարարության մեջ մասնավորապես ասվում է. «Մենք թեթևացած ենք, որ Էրեբունու ոստիկանական շենքի առճակատումը հուլիսի 31-ին ավարտվեց:
Կրկնում ենք, որ Հայաստանում քաղաքական փոփոխության հասնելու նպատակով բռնության կիրառումն անընդունելի է:
Հուլիսի 30-ին Երևանում ԱՄՆ դեսպանությունը հայտարարություն էր հրապարակել` արտահայտելով ԱՄՆ-ի խորը մտահոգությունը հուլիսի 29-ի գիշերը ցուցարարներին ցրելու նպատակով ոստիկանության կողմից օգտագործած դաժան մեթոդների, ինչպես նաև լրագրողներին և նրանց տեխնիկան նշանակետի տակ առնելու վերաբերյալ:
Մենք ողջունում ենք, որ Հայաստանի կառավարությունը հանձն է առել հետաքննել զեկույցները: Մենք ուշադիր կհետևենք այդ հետաքննության զարգացմանը:
Մենք կառավարությանը կոչ ենք անում, որպեսզի ոստիկանական շենքի առճակատմանը մասնակցող բոլոր անձանց օրենքի սահմաններում հավասար և արդար վերաբերմունք ցուցաբերվի»:
