Նախնական տվյալներով Արցախում երկրաշարժի ցնցումները ոչ մի վնաս չեն պատճառել. ԼՂՀ ԱԻՊԾ
Այսօր տեղական ժամանակով ժամը 08:46-ին Ադրբեջանում գրանցված երկրաշարժն Արցախի տարածքում զգացվել է ուժգին ցնցումներով` 3-4 բալ ուժգնությամբ:
Այդ մասին «Արցախպրես»-ի թղթակցի հետ զրույցում տեղեկացրել է ԼՂՀ Արտակարգ իրավիճակների պետական ծառայության ավագ դիսպետչեր Էրիկ Առուստամյանը` հավելելով, որ նախնական տվյալներով հանրապետության տարածքում ցնցումները ոչ մի վնաս չեն պատճառել:
Ինչպես նշում է կայքը, այսօր Ադրբեջանում գրանցված երկրաշարժն զգացվել է նաև Արցախում և Հայաստանում: Ինչպես ավելի վաղ հաղորդել է Միջերկրածովյան սեյսմոլոգիական ընկերությունը, երկրաշարժի էպիկենտրոնը եղել է Բաքվից 143 կմ արևմուտք, Սաբիրաբադից՝ 22 կմ հյուսիս-արևմուտք:
Էպիկենտրոնում այն եղել է 4,9 մագնիտուդ: Հիպոկենտրոնը 62 կմ խորության վրա է:
Հայաստանում այն զգացել են Սյունիքի մարզում, նաև Երևանի որոշ վարչական շրջաններում: Երկրաշարժն ուժգին ցնցում է առաջացրել նաև Արցախում:
