«Տանն ահռելի զինանոց ունեմ, որին հաստատապես կզիջի Սուրիկ Խաչատրյանի զինանոցը». Լևոն Բարսեղյան
Ժամեր առաջ ազատ արձակված Լրագրողների «Ասպարեզ» ակումբի խորհրդի նախագահ Լևոն Բարսեղյանն ու նրա փաստաբան Հայկուհի Հարությունյանը հանդիպեցին լրագրողների հետ: Նախ՝ փաստաբանը նշեց, որ գործն ամբողջությամբ կարճվել է. «Նույն հիմքով գործ Լևոն Բարսեղյանի նկատմամբ այլևս չի կարող հարուցվել, ու նույն հիմքով նա այլևս երբեք չի ազատազրկվի»:
Լևոն Բարսեղյանն էլ զարմանք հայտնեց, որ Սերժ Սարգսյանը չհաջողեց իր այս արկածախնդրության մեջ. «Ըստ երևույթին, իշխանությունը որոշեց նահանջել: Երևի ուզում էին՝ ինձ մեկուսացնել ինչ-որ ժամանակով: Երեկ տան խուզարկության որոշում են ունեցել, գնացել են մեր տուն (ես սեփական տուն չունեմ, տղայիս տանն եմ ապրում, իմ ունեցածը 3 ավտոմեքենան է, ավելի շատ դրանց մեջ եմ ապրում, լավ կլիներ՝ մեքենաները խուզարկելու որոշումներ լիներ), դուռը փակ է եղել: Սա էլ իրենց կոպիտ սխալն է, որովհետև տանը ոչ թե՝ այս տեսակ, այլ՝ ահռելի զինանոց ունեմ, որին հաստատապես կզիջի Սուրիկ Խաչատրյանի զինանոցը: Իրենց գլխակեր օլիգարխների ունեցած զենքը ստից բան է՝ իմ ունեցած զինատեսակների համեմատ»:
Նա նշեց, որ 13 ամիս առաջ, երբ իրեն բերման են ենթարկել, նույն դանակն է եղել մոտը.
«Արձանագրել էին ու դանակն ինձ էին վերադարձրել՝ ասելով, որ նորմալ է, ունեք այդ իրավունքը: Անցած կիրակի էլ, երբ ինձ բերման ենթարկեցին, խուզարկեցին, արձանագրություն կազմեցին, այս դանակն էլ՝ մեջը: Հասկանո՞ւմ եք՝ սրանց բթության մակարդակն ուր կարող է հասնել… Երեկ փաստաբանը Մասիվի ոստիկանությունից հանել է նաև այդ փաստաթղթերը»:
Լևոն Բարսեղյանն ընդգծեց, թե իմացել է, որ ամսի 27-ին հաղորդագրություն են տարածել, թե իբր իրեն բաց են թողել ու ինքը «թռել» է.
«Ինձ Խորենացի փողոցից այնտեղ են տարել գիշերը 2:45 րոպեին, միաժամանակ Սեդա Մավյանին էին բերման ենթարկում: Տարել են Շենգավիթի ոստիկանություն, ես ասել եմ, որ Սերժիկ Սարգսյանի մենթերի հարցերին չեմ պատասխանում: Չպատասխանեցի, ոչինչ չգրեցի, չստորագրեցի, դանակս հանեցին, ուրախացան, առանձնացրին, որպեսզի ուղարկեն փորձաքննության: Ժամը 8:20 րոպեին Շենգավիթի ոստիկանության այդ սենյակ են գալիս Գյումրու Կումայրի բաժնի ոստիկաններ՝ քաղաքացիական հագուստով, ու ինձ բերանացի հանձնում են նրանց: Այդ եկած 3 մենթերն ինձ հրամայում են նստել իրենց մեքենան (սև գույնի ԳԱԶ 31) ու տանում Գյումրու Կումայրի բաժին: Այնտեղ ինձ պահել են 10:30-ից մինչև 14-ն անց քանիս: Ժամը 1-ին բաժնի պետն ինձ բերել է ֆաքսով ստացած ծանուցագիր այն մասին, որ ես ժամը 17:00-ին պետք է ներկայանամ Շենգավիթի ոստիկանություն՝ հարցաքննության: Ես ստորագրել եմ, որ ստացա այդ ծանուցագիրը, և հարցրի՝ ազա՞տ եմ, պատասխանեցին՝ այո, բայց չթողեցին՝ դուրս գամ: Ասացին՝ դուք ազատ եք, բայց մենք պետք է ձեզ տանենք: Էս տեսակ լակոտություն»:
Նա նշեց, որ ֆիզիկական ուժով իրենց պահում են.
«Ժամը 2-ն անց քանիս նստեցնում են մեքենա, տանում են Գյումրի՝ քաղաքի ծայրը (երևի հրաժեշտի տուր էին կազմակերպում Գյումրիով), հետո բերում են Երևան: Երևան հասանք ժամը 16:10-ին, այսինքն՝ 50 րոպե ավելի շուտ, քան հարցաքննության ժամն էր: Շենգավիթի ոստիկանության բաժնում նոր փաստաբանին տեսա: Այդտեղ էլ դուրս չէին թողնում, որ գնամ Քննչական բաժին: Ժամը 5-ից հետո 15 րոպե Հայկուհին դուռը ծեծում էր, ներս չէին թողնում: Հետո նորից սկսեցին ինձ խուզարկել: Ժամը 7-ից 5 պակաս նոր սկսեցին մեղադրանք ներկայացնել ՝ սառը զենք պահելու կասկածանք՝ 235 հոդվածի չորրորդ մասով, ու ձերբակալման որոշում: Ժամը 7-ին տարան դատաբժշկական փորձաքննության, և ժամը 8-ին տարան Էրեբունու՝ ձերբակալվածների պահման վայր, որտեղ 2 օրերի ընթացքում ինձ բացարձակ հարգալից են վերաբերվել: Այդտեղ ինչ տեղի է ունեցել՝ տեղի է ունեցել միայն օրենքի շրջանակներում: Քննչականում նույնպես հարգալից են վերաբերվել: Անհարգալից վերաբերմունք դրսևորել են Կումայրու բաժնի և Շենգավիթի բաժնի մենթանոցներում՝ մի քանի մենթերի կողմից:
Երկու օր այնտեղ պահելուց հետո հայտնաբերեցին, որ իմ դանակը սառը զենք չէ»:
Մանրամասները՝ Մեդիա կենտրոնի տեսանյութում:
