Հիլարի Քլինթոնը նախազգուշացրել է, որ ԱՄՆ-ի համար մոտենում է «հատուցման ժամը»
ԱՄՆ քաղաքացիները պետք է միավորվեն, քանի որ մոտենում է «հատուցման ժամը», իր ելույթում հայտարարել է ԱՄՆ Դեմոկրատական կուսակցությունից նախագահի թեկնածու Հիլարի Քլինթոնը, հայտնում է BBC-ն:
Նրա խոսքով` ազդեցիկ ուժերը սպառնում են երկատել հասարակությունը, իսկ վստահությունն ու հարգանքը միմյանց նկատմամբ նվազում է:
Քլինթոնը նաև կոչ է արել միավորվել ընդդեմ իր հանրապետական մրցակից Դոնալդ Թրամփի «մարտաշունչ քաղաքականության»:
Նրա կարծիքով` Թրամփը ցանկանում է առանձնացնել ամերիկացիներին և երկիրը մեկուսացնել ողջ աշխարհից: «Նա ցանկանում է, որ մենք վախենանք ապագայից և միմյանցից»,- ասել է Քլինթոնը:
«Մենք չենք կառուցի պատեր, և մենք չենք արգելի կրոնը»,- խոստացել է նա: Քլինթոնը հայտարարել է, որ Թրամփը չպետք է մատչում ունենա միջուկային զենքին:
Հիշեցնենք, որ Քլինթոնը դարձավ ԱՄՆ պատմության մեջ առաջին կինը, ով առաջադրվել է նախագահի պաշտոնում երկրի առաջատար քաղաքական ուժի կողմից:
