«Կարո Եղնուկյանը նույնպիսի գործողություններ է իրականացրել, ինչ բազմաթիվ պատգամավորներ, իրավապաշտպաններ, լրագրողներ». ինչու է ձերբակալվել Կարո Եղնուկյանը

Մի քանի օր առաջ ԱԱԾ-ն խուզարկել է Կարող Եղնուկյանի, նրա կնոջ մոր բնականները, ավտոտմեքենաները, ավտոտնակը. և ոչինչ չհայտնաբերով՝ նրան ձերբակալել են: Այս մասին այսօր լրագրողների հետ հանդիպման ընթացքում ասաց Կարո Եղնուկյանի պաշտպան Տիգրան Հայրապետյանը:

Նա նշեց, որ ձերբակալման ժամանակ, որպես այդպիսին, կասկածանքն իրենց գրավոր չի ներկայացվել, պարզապես նշվել է, որ Եղնուկյանը կասկածվում է ՀՀ քրեական օրենսգրքի 218-րդ և 219-րդ հոդվածներով նախատեսված հանցագործություն կատարելու մեջ:

«Դրանք վերաբերում են պատանդներ պահելուն աջակցելուն և շինություններ զավթելուն աջակցելուն: Չեն նշել, թե Կարո Եղնուկյանն ինչ գործողություններ է կատարել, բայց բանավոր հարցադրումներից պարզար դարձավ, որ Կարո Եղնուկյանին կասկածում են, որ նա փորձել է ինչ-որ ձևով այս վերջին 2-3 օրերի ընթացքում ինչ-որ բանով օգնել ապստամբներին կամ զինված խմբի անդամներին»,- ասաց փաստաբանը՝ նշելով, որ Կարո Եղնուկյանը կապվել է Վարուժան Ավետիսյանի հետ, հավանաբար խմբի նաև այլ անդամների հետ, փորձել է լուծել նաև սննդի խնդրի հետ կապված հարցը, այսինքն՝ խոսքն այնպիսի գործողությունների մասին է, որ այսօր կատարվում են շատ քաղաքական գործիչների, պատգամավորների կողմից:

Փաստաբանն ասաց, որ հավանաբար այսօր Կարո Եղնուկյանին մեղադրանք կառաջադրվի, և նրան կալանավորելու համար միջնորդություն կներկայացվի դատարան:

«Իրենք ասում են, որ ոչ թե աջակցել է, այլ աջակցելու փորձ է կատարել: Այսինքն՝ կասկածանքից հստակ երևում է, որ նա որևէ բան չի կատարել, այլ ցանկացել է կատարել: Աջակցելու փորձ տերմին իրավաբանության մեջ չկա: Կարո Եղնուկյանի կարծիքով՝ հստակ հրահանգ կա, որպեսզի իրեն այս պահին հեռացնեն, մեկուսացնեն, որպեսզի նա իր գործունեությունը չծավալի»,- ասաց Տիգրան Հայրապետյանը` անգրագիտություն որակելով մեղադրանքը:

Տիգրան Հայրապետյանն ասաց, որ նշվում է, թե Կարո Եղնուկյանը ցանկացել է աջակցել ապստամբներին. «Մի պահ ենթադրենք՝ աջակցել է: Այդ աջակցությունը վերագրում են նրան, որ Կարո Եղնուկյանի դիտավորությունն է եղել պատանդներին պահել: Եթե այսպես դիտարկենք՝ եթե կամայական անձը փորձում է այդ արյունահեղությունը դադարեցնել, ինչ-որ միջոցներ, որպեսզի խնդիրը լուծվի խաղաղ ճանապարհով, դա համարվում է աջակցություն: Չեմ գտնում, որ իրավաբանությունը կարելի է այսպես լայն մեկնաբանել, ասել, որ աջակցությունն ուղված էր նրան, որպեսզի պատանդներն ավելի երկար պահվեն»:

Տիգրան Հայրապետյանը հիշեցրեց, որ ՀՀ քրեական օրենսգրքի 218-րդ հոդվածը, որը պատասխանատվություն է նախատեսում պատանդ վերցնելու համար, սահմանում է, որ «իր պահանջներից հրաժարված և պատանդին կամովին ազատ արձակած անձն ազատվում է քրեական պատասխանատվությունից, եթե նրա գործողություններն այլ հանցակազմ չեն պարունակում»:

«Եթե զինյալ խմբի անդամները բոլոր պատանդներին թույլատրեն ազատ հեռանալ, նշանակում է՝ այս հանցագործությունն ավարտվեց, հանցագործություն չկա, քրեական պատասխանատվության ենթակա չեն, քանի որ հոժար կամքով պատանդներին թույլատրել է հեռանալ։ Այսօր արդեն Կարո Եղնուկյանին կարող են կալանավորել, բայց վաղն այս նույն խումբը կարող է այս 4 պատանդներին ազատ արձակել: Կստացվի, որ կարո Եղնուկյանին կալանավորում են այն պարագայում, երբ այդ անձանց գործողություններում հանցակազմ չկա»,- ասաց Տիգրան Հայրապետյանը:

Փաստաբանը նշեց, որ Կարո Եղնուկյանը հայտարարել է, որ ինքն ինչ-որ առումով խանգարել է գրոհին, ինչն իշխանությունն իրեն չի ներում: «Այս ամենը հավանաբար պետք է ներկայացվի դատարանին. Կարո Եղնուկյանը նույնպիսի գործողություններ է իրականացրել, ինչ բազմաթիվ պատգամավորներ, իրավապաշտպաններ, լրագրողներ»,- եզրափակեց նա:

Անդրադառնալով ՀՀ քրեական օրենսգրքի 219-րդ հոդվածին՝ շենքեր, շինություններ, տրանսպորտի, հաղորդակցության կամ կապի միջոցներ զավթելը, Տիգրան Հայրապետյանն ասաց, որ այն «բոլորովին անտեղի հոդված է»:

Նրա խոսքով՝ հոդվածը սահմանում է՝ շենքեր, շինություններ, տրանսպորտի, հաղորդակցության կամ կապի միջոցներ, այլ հաղորդակցության ուղիներ զավթելը կամ դրանք պահելը՝ զուգորդված՝ դրանք ոչնչացնելու կամ վնասելու սպառնալիքով, որը կատարվել է զավթածն ազատելու պայմանով պետությանը, կազմակերպությանը կամ քաղաքացուն որևէ գործողություն կատարելուն կամ որևէ գործողություն կատարելուց ձեռնպահ մնալուն հարկադրելու նպատակով: Ըստ նրա՝ հանցակազմ առկա կլիներ, եթե զինյալ խումբ ասեր, որ իրենց պահանջը չկատարելու դեպքում շինությունը չոչնչացնեն, սակայն նման տեղեկութոյուններ չկան