Ի՞նչ է կատարվել գիշերը Խորենացի փողոցում
Գիշերը Խորենացի փողոցում լարվածությունը չէր մեղմվում: Ոստիկանների ու ցուցարարների միջև բախումից հետո կային տուժածներ, որոնց մասին ավելի ուշ տեղեկատվություն տրամադրեց ՀՀ Առողջապահության նախարարությունը:
Ըստ ԱՆ տվյալների՝ Երևանի բժշկական կազմակերպություններ է դիմել 51 տուժած, նրանցից 29-ը` ոստիկան։ «Տուժածներից 15-ն անհրաժեշտ բժշկական օգնությունը ստացել է ամբուլատոր պայմաններում։
Այս պահի դրությամբ, գիշերը տեղի ունեցած միջադեպի հետևանքով տարբեր վնասվածքներ ստացած 34 տուժած «Սուրբ Գրիգոր Լուսավորիչ», «Էրեբունի», «Երևան», «Արմենիա» հանրապետական բժշկական կենտրոններում, «Հերացի» թիվ 1 համալսարանական համալիրում շարունակում են հիվանդանոցային բուժումը»,- ասվում է ԱՆ հաղորդագրության մեջ:
Տուժողներ կան նաև լրագրողների շրջանում, որոնք հայտնվել էին ցուցարարների և ոստիկանների մեջտեղում:
Քննչական կոմիտեից էլ տեղեկացնում են, որ Երևանի քննչական վարչությունում հարուցվել է քրեական գործ` ՀՀ քրեական օրենսգրքի 225-րդ հոդվածի 2-րդ մասի հատկանիշներով: Հուլիսի 21-ին` ժամը 08-ի դրությամբ, զանգվածային անկարգություններին անմիջական մասնակցություն ունենալու կասկածանքով բերման է ենթարկվել 28 անձ, որոնցից 16-ը ձերբակալվել է:
Այս պահին Խորենացի փողոցում իրավիճակը հանգիստ է:
