Թուրքիայում 14 ռազմանավ է անհետացել. Times
Թուրքիայի ռազմածովային նավատորմից ռազմական հեղաշրջման փորձից հետո անհետացել է 14 ռազմանավ, գրում է Times պարբերականը: Հուլիսի 15-ից նավերը կապի դուրս չեն եկել:
Բացի այդ՝ հայտնի չէ նաև նավատորմի հրամանատար Վեյսել Քեզելի ճակատագիրը, որը նույնպես հուլիսի 16-ից կապի դուրս չի եկել: Նա կարող է պատանդ վերցված լինել հեղաշրջման ղեկավարների կամ ապստամբների կողմից:
Անհետացած նավերը ծառայություն են իրականացրել Էգեյան և Սև ծովերում: Ինչպես գրում է պարբերականը, ենթադրաբար, որոշ նավեր կարող էին ուղևորվել հունական նավահանգիստներ:
Հիշեցնենք, որ հեղաշրջման փորձից հետո թուրք 8 սպա ապաստան է խնդրել Հունաստանից՝ այնտեղ ուղևորվելով ուղղաթիռով:
Թուրքական ԶԼՄ-ները գրում են, որ Քեզելին խաբեությամբ նավ են տարել ապստամբները՝ նրան ասելով, թե ահաբեկչություն է տեղի ունեցել:
Նշվում է, որ Թուրքիայի կառավարությունը հրաժարվել է մեկնաբանել նավատորմի հրամանատարի հետ կատարվածը, սակայն հաստատել է, որ որոնում են կասկածելի սադրիչների:
