Թուրքիայում 103 գեներալ և ծովակալ է ձերբակալվել
Թուրքիայում ռազմական հեղաշրջման փորձ իրականացնելու գործով երկրում շարունակվում են ձերբակալությունները բարձրաստիճան զինվորականության շրջանում: Ինչպես տեղեկացնում է թուրքական «Անադոլու» գործակալությունը, ողջ երկրի տարածքում ձերբակալվել են 103 գեներալ և ծովակալ:
Միայն Անկարայում ձերբակալված գեներալների թիվը 29-ն է: Թուրքիայի արդարադատության նախարար Բեքիր Բոզդաղը հայտարարել է, որ երկրում «զտումները» շարունակվում են, ձերբակալված է շուրջ 6 հազար մարդ: Ակնկալվում է, որ այս թիվն առաջիկայում ավելանալու է:
Անկարայի գլխավոր դատախազությունը 2 հազար 745 դատախազի և դատավորի ձերբակալելու թույլտվություն է տվել: Թուրքիայում հուլիսի 15ի ձախողված հեղաշրջման ժամանակ Թուրքիայի տարբեր քաղաքներում սկսված բախումների հետևանքով զոհվել է
շուրջ 290 մարդ: Վիրավորների թիվը պաշտոնական տվյալներով 1440 է:
Թուրքիայում տեղի ունեցած իրադարձությունների ժամանակ ՀՀ քաղաքացիներ կամ հայեր չեն տուժել։
