Էրդողանը հեղաշրջման փորձի ժամանակ րոպեների տարբերությամբ փրկվել է մահից. Reuters
Reuters գործակալության հաղորդմամբ՝ Թուրքիայի նախագահ Ռեջեփ Թայիփ Էրդողանը երկրում ձախողված հեղաշրջման փորձի ժամանակ րոպեների տարբերությամբ լքել է զբոսաշրջային Մարմարիս քաղաքի հյուրանոցը, մինչ այնտեղ կժամանեին ապստամբ զինվորականները:
Գործակալությունը, հղում կատարելով CNN Turk-ին, հայտնում է, որ հեղաշրջման կողմնակիցները Մարմարիս էին ուղարկել երեք ուղղաթիռ, որում գտնվել էր 25 զինվորական: Զինվորականները պարաններով իջել էին ուղղաթիռներից, սակայն հյուրանոցում նրանց դիմադրություն էր ցուցաբերել Էրդողանին հսկող հատուկ նշանակության ուժերի ջոկատը:
Թուրքիայի իշխանությունները կալանավորել են մոտ 6 հազար մարդու, որոնց կասկածում են հեղաշրջմանը առնչություն ունենալու մեջ:
Շարունակվում են նաև դատավորների և դատախազների զանգվածային կալանավորումները:
Էրդողանը հայտարարել է, թե ապստամբների հիմնական օջախները ոչնչացվել են:
