Հայաստանում սկսվել են ռուսական ռազմաբազայի դիպուկահարների դաշտային մարզումները
Հայաստանի բարձրլեռնային «Կամհուդ» զորավարժարանում սկսվել են ՌԴ հարավային ռազմական շրջանի ռուսական բազայի դիպուկահարների դաշտային նախապատրաստական աշխատանքները: Հարավային ռազմական շրջանի մամուլի ծառայությունից հայտնում են, որ պրակտիկ մարզումներին ներգրավված են 100-ից ավելի դիպուկահարներ: Հիմնական ուշադրությունը սևեռված է լինելու զինծառայողների ուսուցմանը, տակտիկական և կրակային պատրաստությանը` հաշվի առնելով բարձրլեռնային «էքստրեմալ» պայմանները: Մարզումների հիմնական մասն անցկացվելու է երեկոյան ժամերին` գիշերային տեսողություն ապահովող սարքերի օգտագործմամբ:
Հատուկ ուսումնական կենտրոնում պատրաստություն անցած հրահանգիչները մարզումներ կանցկացնեն նորակոչիկների հետ` անհատական կանոնների և «Դրագունով» դիպուկահար հրացանով կարևոր նպատակակետեր ընտրելու ուղղությամբ:
Դիպուկահարների պատրաստման պարապմունքները կավարտվեն մրցույթների անցկացմամբ, ինչպես նաև նորմատիվների հանձնմամբ:
