ԼՂՀ ոստիկանապետը պարգևատրել է ճանապարհային ոստիկանների
ԼՂՀ ոստիկանության ճանապարհային ոստիկանությունում նախօրեին տեղի է ունեցել պարգևատրման արարողություն։
ԼՂՀ ոստիկանության մամլո ծառայության փոխանցմամբ` ընթացիկ տարվա 1-ին կիսամյակի արդյունքներով ծառայողական պարտականությունները բարեխիղճ կատարելու համար ԼՂՀ ոստիկանության պետ, գեներալ-մայոր Կամո Աղաջանյանի հրամանով` ճանապարհային ոստիկանության 8 ծառայողներ պարգևատրվել են «Օրենքի պատվար» մեդալով, 2 ծառայող՝ «Ոստիկանությունում գերազանց ծառայության համար» կրծքանշանով, 2 ծառայող՝ հուշանվերով, 33 ծառայող արժանացել են դրամական խրախուսման, իսկ 15 ծառայողից հանվել է նախկինում նշանակված կարգապահական տույժը։
Ճանապարհային ոստիկանության պետ, ոստիկանության փոխգնդապետ Իգոր Օհանյանը, հանդիսավորությամբ հանձնելով պարգևները, հավաստիացրել է, որ ոստիկանության պետի կողմից ճանապարհային ոստիկանության ծառայողների քանակական առումով նախադեպը չունեցող նման պարգևատրումները էլ ավելի կբարձրացնեն ճանապարհային ոստիկանության ծառայության արդյունավետությունը և նոր լիցքեր կհաղորդեն ու կպարտավորեցնեն յուրաքանչյուր ծառայողի։
