Քաղաքապետարանը 120 ծառայողական ավտոմեքենաներից կկրճատի ընդամենը 26-ը
Երևանի քաղաքապետարանն իր 120 ծառայողական ավտոմեքենաներից կկրճատի 26-ը: Այս մասին այսօր ԱԺ-ում լրագրողների հետ զրույցում հայտարարեց փոխքաղաքապետ Կամո Արեյանը: Քաղաքապետարանում ծառայողական մեքենաներից օգտվելու իրավունք ունեն քաղաքապետը, նրա տեղակալները, վարչության պետերը, համայնքների ղեկավարները, նրանց որոշ տեղակալները:
«Դրանք քաղաքապետարանի և ենթակա կազմակերպությունների մեքենաներն են»,- ասաց Կամո Արեյանը՝ հավելելով, որ բոլորն էլ աշխատող, օգտագործման պիտանի մեքենաներ են:
Կ.Արեյանը նշեց, որ այս պահին քաղաքապետարանի աշխատակազմը կրճատելու խնդիր դրված չէ: Կրճատման ենթակա չեն նաև աղմկահարույց ներկայացուցչական ծախսերը: Ըստ փոխքաղաքապետի` դրանք պետք է լինեն զուսպ, հավասարակշռված, բայց չեն կարող զրոյացնել այդ ծախսերը:
